Aktiviteti i AFPro: Udhët e Karrierës bashkon 150 nxënës të arsimit 9-vjeçar në shkollën “Qemal Mici” në Durrës
Shkolla e Mesme Profesionale “Hamdi Bushati” fiton sfidën Pjata Juaj Ikonike!
20 Shkurt, 2024
Aktiviteti Të Nxënit 2.0: Mbështesim mësuesit e arsimit dhe formimit profesional në Shqipëri
1 Mars, 2024
U zhvillua më 28 shkurt aktiviteti Udhët e Karrierës, organizuar nga Rrjeti i Profesionistëve-AFPro me mbështetjen e programit Qëndro në Shkollë zbatuar nga UNICEF dhe financuar nga Ambasada Italiane. Ky aktivitet mblodhi në shkollën 9-vjeçare “Qemal Mici” në Durrës 150 nxënës të shkollave 9-vjeçare në vend, prindër, mësues dhe përfaqësues të bizneseve lokale.
Një panel me përfaqësues të institucioneve arsimore, bashkisë Durrës dhe shkollave kyçe të arsimit profesional në qytet ndau me të rinjtë potencialin e arsimit profesional në vend. Drejtori i Arsimit dhe Kulturës në Bashkinë Durrës, Ardian Gurra, Drejtuesja e Zyrës Vendore Arsimore, Durrës, Amarilda Thërmija, Drejtori i Shkollës Profesionale “Beqir Çela”, Fatmir Mërkuri, Drejtorja e Shkollës së Mesme Teknologjike “Hysen Çela”, Blerina Dervishi dhe Drejtori Shkollës 9-vjeçare “Qemal Mici”, Eduard Prenga, ndanë më nxënësit rëndësinë e zgjedhjeve të informuara duke u ndalur tek drejtimet që ofrohen në këto shkolla.
Drejtuesja e ZVA Durrës, Amarilda Thërmija i inkurajoi të rinjtë të bëjnë zgjedhje të informuara për të ardhmen e tyre. “Ju jeni në kohën më të mirë për të zgjedhur të ardhmen tuaj, në çfarëdo drejtimi qoftë ajo,” u shpreh ajo.
Drejtoresha e shkollës së mesme teknologjike “Hysen Çela”, Blerina Dervishi dhe Drejtori i Shkollës Profesionale “Beqir Çela”, Fatmir Mërkuri ndanë me pjesëmarrësit larmishmërinë e degëve të ofruara në shkollat ku ata drejtojnë. Duke u fokusuar në drejtimet e ofruara nga shkollat, numri I madh I regjistrimeve të nxënësëve, por edhe akreditimi që këto shkolla kanë brenda dhe jashtë vendit, ata sollën një informacion të detajuar për nxënësit dhe prindërit e pranishëm.
“Shkolla Profesionale “Beqir Çela” ka marrë 35% të nxënësëve në qytetin e Durrësit. Kjo është një shifër e mirë në nivel kombëtar. Gjithashtu kjo shkollë është një nga 5 të parat në vend që ka marrë akreditim. Kjo e pozicionin në një post të favorshëm në tregun shqiptar por edhe atë jashtë vendit.” – theksoi Drejtori i Shkollës Profesionale “Beqir Çela”, Fatmir Mërkuri
Drejtori i Arsimit dhe Kulturës në Bashkinë Durrës, Ardian Gurra u shpreh se takime të tilla janë tepër të nevojshme jo vetëm për nxënësit, por edhe për prindërit. Ai I inkurajoi të rinjtë të vazhdojnë të jenë kuriozë dhe të eksplorojnë pasionet e tyre për të pozicionuar veten sa më mirë në të ardhmen.
Eksperti I TIK, Admir Malaj ndau me të rinjtë të rejat e tregut në botën e teknologjisë. Ai i mëshoi larmishmërisë së mundësive që të jep industria e teknologjisë, informacionit dhe komunikimit. Duke jetuar në një botë ku kjo teknologji ecën me hapa marramendëse, mënyra më e mirë për të qëndruar në brendësi të saj është të jesh gjithmonë I informuar. Ai përmendi mundësitë që u ofrohen të rinjve, kursin veror Code for Albania, programin e codimit përmes e-albania si dhe garancinë rinore. Ai gjithashtu i këshilloi të rinjtë të eksplorojnë duke provuar interesa të ndryshëm që në moshë të re. Përfshirja në projekte të hartuara specifikisht për zhvillimin e aftësive të nevojshme në këtë industri është me rëndësi të lartë.
Nda me mua eksperiencën tënde
Një aktivitet i tillë nuk mund të ishte i plotë pa nxënësit që vazhdojnë edukimin e tyre në shkollat e arsimit profesional dhe mësuesit e lëndës në këto shkolla. Nxënëset Gledia Barxhi dhe Serena Haxhi ndanë me nxënësit e shkollave 9-vjeçare dhe prindërit e tyre rrugëtimin e tyre në arsim profesional. Ato i inkurajuan të konsiderojnë këto shkolla në zgjedhjet e tyre pas arsimit 9-vjeçar. Duke përmendur programet e tyre të preferuara, aftësitë e fituara, përfshirjen në projekte shkollore dhe eksperiencën e tyre të punës në biznese të ndryshme, ato u dhanë një perspektivë tjetër të gjithë të interesuarëve.
Aktiviteti Udhët e Karrierës synon të fuqizojë nxënësit, prindërit dhe mësuesit e arsimit profesional duke i informuar mbi programet, kurrikulat e drejtimeve TIK, Hoteleri-Turizëm dhe Bujqësi, si dhe mbi mundësitë dhe risitë e tregut të punës. Ky forum i hapur erdhi si një mundësi bashkëbisedimi duke krijuar ura lidhëse midis nxënësve të shkollave 9-vjeçare dhe nxënësve dhe drejtuesëve të shkollave profesionale në Shqipëri.
Ndiqni për më shumë në afpro.al.
