Sesioni i II i rubrikës ‘Pyet Mentorët’
U zhvillua sesioni i dytë i mentorimit virtual ‘Pyet Mentorët’ me ekspertët e Rrjetit të profesionistëve të industrivë TIK, Bujqësi dhe Hoteleri-Turizëm. Për tre ditë me rradhë, në 3 takime të ndryshme, 68 nxënës të arsimit dhe formimit profesional të shkollave të ndryshmë në Shqipëri patën mundësinë të bëjnë pyetjet e tyre mentorëve Bujar Bakium (Data Max), Dhurata Thanasi Daneri (Luga e Argjendtë) dhe Gid Shaqiri (Mk Hotel Tirana).
Kjo rubrikë synon të mbështesë nxënësit duke krijuar ura lidhëse mes tyre dhe profesionistëve të fushës. Disa nga temat e trajtuara në këto bashkëbisedime ishin të rejat e fundit në këto industri, aftësitë bazë të nevojshme për të qenë i suksesshëm në profesionin e zgjedhur, modulet/programet më të nevojshme për t’u rritur profesionalisht si dhe rrugëtimi personal i vetë ekspërtëve në industritë përkatëse.
Të tre ekspertët vlerësuan rëndësinë e arsimit dhe formimit profesional në zhvillimin e një karriere të suksesshme në këto fusha, por gjithashtu u shprehën se interesi vetjak duhet të kultivohet nga çdo nxënës duke lexuar libra/artikuj mbi pasionet e tyre, nëpërmjet praktikave të punës si dhe duke njohur sa më shumë njerëz të industrisë (nëpërmjet netëorking).
Eksperti i TIK, Bujar Bakiu (Data-Max) u shpreh mbi rëndësinë e programeve bazë të zhvillimit të të dhënave duke evidentuar Python si gjuhën e tij e preferuar të programimit. Ai foli më gjerë mbi hapat teknike për krijimin e aplikacioneve dhe website-eve. Shumë kureshtje kishte nga nxënësit mbi risitë e fundit teknologjike sic është inteligjenca artificiale. Bakiu u shpreh se kjo është një risi e kohës dhe kompania Data Max, ku ai është bashkëthemelues, e përkrah pasi e thjeshtëzon mbarëvajtjen e një biznesi.
Përtej aftësive teknike që duhen në të treja këto industri, eksperti i Hoteleri-Turizmit, Gid Shaqiri (Mk Hotel Tirana) i mëshoi më shumë rëndësisë së aftësive të buta.
“Hoteleria është gjithmonë e lidhur me emocionin. Komunikimi i strukturuar është një nga aftësitë më të forta në çdo teknikë shërbimi. Më pas, dëshira për të punuar dhe investimi tek vetja bëjnë dallimin tek çdokush që dëshiron të jetë pjesë e industrisë së hoteleri-turizmit”, – theksoi Shaqiri.
Nëpërmjet këtyre takimeve rrjeti i profesionistëve të AFPro mbështet rritjen dhe zhvillimin profesional duke hapur një dialog të dyanshëm e duke afruar bizneset e industrisë me profesionistët e rinj.
Ndiqni për më shumë në afpro.al
