Aktiviteti Të Nxënit 2.0: Mbështesim mësuesit e arsimit dhe formimit profesional në Shqipëri
Faza e II e aktivitetit Të Nxënit 2.0, organizuar nga Rrjeti i Profesionistëve – AFPro & mbështetur nga programi Qëndro i UNICEF, mblodhi bashkë në Fier 20 mësues të lëndës së profesionit nga: Shkolla e Mesme Bujqesore “Rakip Kryeziu”(Çlirim), Fier, Shkolla “Petro Sota”, Fier, Shkolla Industriale “Pavarësia”, Vlorë, Shkolla Profesionale “Thoma Papapano”, Gjirokastër, dhe Shkolla “Tregtare”, Vlorë në një trajnim interaktiv mbi promovimin e aftësive të buta ,rritjes personale, si dhe risitë e fundit të tregut të punës.
Eksperti i Deloitte Albania, Spartak Alibali, Menaxher i Departamentit të Burimeve Njerëzore dhe CEO i Trifolium ShPK, Admir Malaj ndanë ekspertizën e tyre mbi rëndësinë e aftësive të buta, përfshirjen e tyre në kurrikulat e mësimdhënies, proceset e rekrutimit në kompani të ndryshme dhe të rejat e fundit të tregut në fushën e teknologjisë
Spartak Alibali, gjatë prezantimit të tij u fokusua tek metodat më të mira për të nxjerrë në pah dhe për të zhvilluar potencialin e nxënësëve në arsim dhe formim profesional. Gjatë prezantimit të tij, ai u ndal tek disa nga rezultatet e studimit “Deloitte Global Gen Z and Millennial Survey” mbi karakteristikat e sjelljes dhe mendimit të gjeneratës Z si: prioritetizimi i shëndetit mendor, qasje e të bërit vetë të detyrave, fleksibiliteti i të punuarit ngado dhe kudo, informimi i lartë teknologjik, përdorimi në masë i rrjeteve sociale dhe fjalës së gojës, rëndësia të qenit pjesë e tregut dhe komunitetit global etj.
Të gjithë këto indikatorë, sipas Spartakut, n”a informojnë dhe na ndihmojnë në përshtatjen e sjelljes tonë si punëdhënës apo mësues për të zhvilluar potencialin e brezit të ri dhe forcës së re të punës. Ekipi i mësimdhënies, duke qënë i informuar mbi aftësitë e gjithësecilit brenda klasës, mund të shtyjë në zhvillimin më të mirë të këtyre aftësive.
“Është e rëndësishme zbulimi i aftësive të gjithësecilit brenda klasës. Pjesëmarrja në projekte duke ndarë rolet brenda grupit zhvillon komunikimin por edhe lidershipin dhe përgjegjësinë e nxënësëve.” – u shpreh Spartaku.
Gjatë diskutimit me mësuesit u evidentuan disa praktika si: përdorimi i projekteve brenda klasës, puna në grup për të zhvilluar komunikimin por edhe lidershipin, nxitja e ideve krijuese dhe mbeshtetja e tyre gjatë mësimdhënies, inteligjenca emocionale, mënyra më e mirë e zgjidhjes së konflikteve etj.
Eksperti i TIK, Admir Malaj ndau me mësuesit disa mundësi për nxënësit e interesuar në botën e teknologjisë. Ai përmendi kursin veror Code for Albania, programin e kodimit si dhe garancinë rinore. Përfshirja e të rejave më të fundit të teknologjisë në kurrikulën e mësimdhënies dhe strukturizimi i materialeve mësimore në një gjuhë më të thjeshtë, të shkurtër dhe interaktive, sipas Admirit, është kyçi për të tërhequr vëmendjen e të rinjve.
Të Nxënit 2.0 u fokusua në mbështetjen e ekipit mësimor duke I informuar mbi aftësitë e nevojshme për të mësuar forcën e re të punës. Ky trajnim shërbeu si një urë lidhëse mes edukimit dhe industrive duke u siguruar që nxënësit e arsimit dhe formimit profesional në Shqipëri të jenë të përgatitur për sfidat dhe mundësitë e tregut të punës.
